Tuesday, 31 March 2009

செக்கு மாடு

கார் கூந்தல் வகிடெடுத்து 
கச்சிதமாய் குழல் பின்னி
காரிகையாள் வலம் வருவாள் 
கறுப்புக் கலர் லுமாலாவில்

அவரிண்டை ஹீரோ ஹொண்டா
அம்மான்ர காசினிலே
கணநேர கண்சிமிடுக்கு 
கடை கடையாய் காத்திருப்பார்

வட்ட முகம் காண
வாலிபம் முறுக்கேறும்
ஆவலுடன் தொடர்ந்து விட்டால்
”ஏனப்பா வந்தனீர்” 
ஏமாற்றம் அவருக்கு

இண்டைக்கு ஏனிவளோ
இறுகிக் கொண்டு போகிறாள்
நாளைக்கு சரியாயிடும் 
நம்பிக்கையுடன் காத்திருப்பார்

காத்திருந்து கடக்க விட்ட
காலத்தைக் கல்வியிலே
ஊக்கமாய் உழைத்திருந்தால்
ஊர் போற்றும் டாக்டர் இன்று

செக்கு மாடு போல
செருப்புத் தேய சுற்றியதால்
அரைஞாண் கயிறு மிஞ்ச
அடைந்தார் அவுஸ்திரேலியாவை

சென்றார் ஊர்விட்டு, விட்டுச்
செல்லா நினைவுகளே
செக்கு மாட்டினைப்போல் -அவள்
சிற்றிடையை சுற்றி வரும்.

( நண்பன் நிஷாந் எழுதியது)


No comments:

Post a Comment